الوقت كالسيف ان لم تقطعه..قطعك

الاثنين، سبتمبر 28، 2009

لوحة الآهات


..
عشان نفهم الحكاية من اولها..
الكلام اللى انا كاتبه تحت دة - سموه زى ما تسموه - مش شعر زى مانتو فاكرين ..
مقعدتش اعصر دماغى عشان ينقط كلام حلو وبعدين ارتب كل كلمة جنب التانية واعمل قصيدة شيك ..
ولا عملت فنجان قهوة وقعدت جنب الشباك وشغلت موسيقى هادية..مستنى الغزالة تروق ويتفضل عليا الالهام بكلام عسول ..

لا لا لا على فكرة مش كدة خالص..
الفكرة بكل بساطة انى حبيت.. ايوة حبيت
حبيت واحدة رقيقة ..لدرجة انى سالتها مرة ايه اكبر حلم نفسك تحققيه؟
قالتلى..
انى اتمشى على شط البحر ساعة الغروب واكون لابسة فستان ابيض وسايبة شعرى .. واكون حافية
قلتلها بس كدة؟
قالتلى اه .. وانت نفسك في ايه؟

قلتلها ..
نفسى فى يوم احققلك حلمك..بس اكون ماسك ايدك وانتى بتجرى على الشط..
بضحكة قالتلى.. لا طبعا هكون لوحدى ..وايه كمان؟
قلتلها ..
اخدك فى حضنى .. وا......
ماتيجى نشوف الكلام على الطبيعة ..
بس المهم تكونو عارفين انه كان محفور جوايا .. شلته من قلبى وحطيته هنا..لاشعر ..ولا الهام ..ولا عارف اصلا اسميه
تعالو نشوف الحلم الرقيق اتصور جوايا ازاى..




















باسيب الدنيا تتغيّر
وتتكسّر..

واعيش الحلم وياكى..
حصان ابيض وفارس ..لا.. دة حلم قديم
فى بالك انتى احلامك ..
حاجات تانية..
حاجات حلوة ..
حاجات من كتر حلاوتها .. باعيش فيها
وبلاقيها..

بموت فيها..
وبعشقها ..
ووعد فى يوم لاحققها..

دى احلامك...

هاعيش الحلم

وييجى الحلم..
فى موجة شايلة جواها ..
هوا شفاف..
ومش بيخاف..
يطيّر شعرك الاسود.. وديل فستانك الابيض..
وتجرى واجرى وياكى ..
على الرملة..

بنرسم لوحة بالخطوة..
وتيجى الموجة وتاخدها..
وتبعتها..
لحضن الشمس..
وتفضل لوحة الخطوات
فى حضن الشمس تتدفى..

وتفضل شمسنا واقفة..
متنزلشى..
بتحضن لوحة الخطوات...

يغار البحر ويغازل..
حبيبته الشمس..
عشان تنزل..
متنزلشى...
وتفضل لوحة الخطوات ..
فى حضن الشمس تتدفى..

اغار منها..

وتيجى فى حضنى ادفيّكى..

ومن جوايا ادوب فيكى..
على شعرك تنام ايدى ..

واصحّيها ..
وابوس ايدك..
وابوسك ..
ومقدرشى...

اموت فيكى ..
عشان اعرف اعيش ليكى..

واورّيكى..
وابوس النسمة اللى تعدّى على خدّك..
وابوس خدك..

وابوس الاّهة فى شفايفك..

وادوّبها وادوب فيكى..

واضيع منك..

واموّت نفسى واحييكى..

ابوس شعرك..
وكل خصلة تحكيلى..
تغنّيلى.. بصوت الهمس..

ابوس عينك ..
وابوس رمشك ..
وصوت رمشك يفوقنى..
وياخسارة...
يصحينى..

والاقى شمسنا واقفة..

تبص لنا..
بترسم لوحة الاهات..

وتحضن لوحة الخطوات..
تدفيّها ...

وادفيّكى....