الوحش .. والاميرة الحسناء

كل شئ يتطور بمرور الزمن ..
حتى الحواديت .. بتتطور !!
تعالوا نسمع حدوتة قبل النوم .. وبدل ما ننام نفضل صاحيين نفكر ..
ليه الدنيا بتتغير..؟!!

************************

كان يا ما كان ..
فى سالف العصر والاوان ..
اميرة حسناء ووحش كبير..
الوحش خطف الاميرة الحسناء وطلع على قمة الجبل ..فى قصره الكبير..
اللى محدش يقدر يوصله..
ولكن فارس شجاع تحدى الصعاب وتصدى لكل الاهوال وقدر يوصل للقصر ..
وبدأت المعركة ..
بين الوحش الكبير والفارس الشجاع اللى كان خلاص هيموت الوحش .. ولكن..
فجأة .. طلعت الاميرة الحسناء وقالتلهم استنوا !!

وراحت للفارس وسألته .. انت مين؟؟
قالها انا فارس من المدينة وجاى عشان اخلصك من الوحش..
قالتله عنك قصر كبير زى ده ؟؟
قالها لا !!
طب وعندك فلوس كتير عشان تصرف عليا؟؟
قالها لا !!
قالتله طب عندك عربية بى ام دبليو اخر موديل ؟؟
قالها لا !!
قالتله امال جاى ليه ؟؟
قالها انا جاى عشان انقذك من الوحش واتجوزك وابقى أمير..ونعيش فى سعادة وهناء..
قالتله يعنى انت داخل على طمع يا روح امك ..؟؟!!

وانقضت الاميرة على الفارس وانقذت الوحش منه ..
واتجوزت الوحش..
وعاشت معاه فى تبات ونبات .. وجابو وحوش كتير وبنات ..!!!
وتوتة توتة خلصت الحدوتة..!!